Mudjes di nha terra

Portela kel dia manxe caladu, baxu frio, neba detadu na txon, sima kel fumaça canhoto ki nha avó ta fumaba. Capel na burcan, nubri ta labanta la na banda monti bedja. Dia bunitu, tempu sabi, ki ta alegra nha coraçan. Kantu n'labanta pan ba xixi trás di casa um obi um rabuliço, n'spia pa ladu skerda n'odja um minininha. El staba di costa, por isso ca da pa sabe cumó kel era, si bunita ó ná. El teneba cabeça marradu cu um lenço branco. El obi nha passo na scora el spia pa trás e el odjan ta spial brigonha dal, kreki ê pamodi el teneba rostu xuxu di tirna caleron kel laba dentu cedo, ó talvez pamó el ca conxeba mi, ó talvez pamó simples fato di el staba ta kodje lenha dentu cedo pel faze cafe pa se donu. Ma foi tão engraçado ki n'ka consegui disfarça um sorriso nem satisfação di sta tão perto del. Kuza stranho, djan odjaba kel rapariguinha argun bez, mas nada ki pudesse ter despertadu argun mau intenção.
Cantu n'da kuel, n'disfarça, n'fra bom dia, el parguntan, Undé bu sta bá, garganta trancan, cumó ki n'al fraba pikena ma n'sta ta ba mixa tras di casa, N'sta ba ordinha cabra, foi primeru cusa kin pensa, el spian dentu d'odju el fran, Pundé caneca, na kel momento coraçan bate tão forte ki kuase n'obil ta zuni na rotxa. El spia pa txon el arri, sima cusa el staba ta fra, Cabra bu ca sta ba ordinha, ó é xixi ó ê cócó. N'fadiga n'fral, Ê xixi, n'staba ta ba xixi, ma ê ca era tras di casa, era na kemada. El spia pa txon el arri di novo. N'ka nem tenta imagina kuza kel pensa dez bez.
El bá dentu fadigado, djel sabeba ma se donu ka era txakota, ma antes el kanba el fran, Bó é di bila, n'sacudi cabeça na sintido de afirmação, n'parguntal pamodi el fran, Pamodi mi n'gosta só di minin di txan, minin di bila é tudu cunfiado. Paki, cantu el fran sim agu djobe rabenta na odju, n'tenta argumenta argun kuza, ma boca ca djudan, n'da um gaguixada, garganta fica seco cran, mon treme, n'disisti. Ê midjó bu fica caladu as vezes. N'bara pa kemada n'ba ordinha cabra, ordinha cabra ná, xixi, spia cumó n'fica disorentadu.
Kel dia mé n'bá bila. Cantu n'staba ta passa na carro carreda frenti casa sê avô n'spia pan odja sel staba la. El sai na beco, coraçan dan pati pati na petu, n'labanta braço n'dal txau, el dan txau e um sorriso, di kel tipo ki ta entrabu na memoria e el ta nega sai. n'ganha nha dia.
Falando na dia, txuba dja staba pertadu kel ora, xalelé ta corré na rodja, ronco txeia ta bomba na burcan. N'spia pa tras pa n'odjal más um bez, djel viraba, n'odjal ku se lenço branco, ta anda sima cuza el ca era des mundo, discarçada, simples, ma ku um jeito de ser ki só mudjes di txan tem, ki ta cativano sempre.
Kantu n'txiga bila n'fika dodu pan torna bá txan, pan parguntal se nome, pamó nem kel n'ca parguntal kel ora kin n'ba ordinha cabra. Ordinha cabra ná...